ದೀಪಾವಳಿ ……ದೀಪಾವಳಿ…………. ಗೋವಿಂದ ಲೀಲಾವಳಿ.. ಅಳಿಯ ಮಗನಾ……..
” ಹರಿಯಾ ಆ ಟೇಪ್ ಸೌಂಡ್ ಒಂಚೂರ್ ಕಮ್ಮಿ ಮಾಡ್.. ಕೆಮಿ ಕೆಪ್ಪ್ ಆಯ್ತಾ ನಿಮ್ದ್?”… ಗಡಾ ಹೋಯ್ ಕಮ್ಮಿ ಮಾಡ್, ಇಲ್ದಿರ್ ಅಪ್ಪ ಪಟಾಕಿಗ್ ದುಡ್ದ್ ಕೊಡುದಿಲ್ಲ.. ಹ್ಮಾಂ.. ಸರಿ; ಗಳಿನ್ ಒಟ್ಟಿಯಂಗ್ ದುಡ್ಡ್ ಇಟ್ಟದ್ ತೆಗುವಾ? ಪಟಾಕಿಗ್ ಆತ್ತ್…. ಉದ್ದ ತೆಮಿಗ್ ಕಟ್ಟದ್, ಬಿದ್ರಂಗ್ ಮಾಡದ್ ಗೂಡ್ ದೀಪ ಗಾಳಿಗ್ ಬಾಲ ಬೀಸ್ತಾ ಇತ್ತು…ಬಿಸ್ಲ್ ನೆತ್ತಿಗ್ ಏರುಕ್ ಹತ್ತಿತ್…. ಸೆಗ್ಣಿ ಸಾರ್ಸದ್ ಕಣ್ಣ ಹಾಂಗ್ ಒಣುಕ್ ಸುರು ಆಯ್ತ್.. ” ಟೇಪ್ ಸೌಂಡ್ ತಿರ್ಸದಂಗ್ ಮಾಡದ್ ಸಮ; ಸೌಂಡ್ ಕಮ್ಮಿ ಆದಂಗ್ ಕಾಂತಿಲ್ಲ..ಅಪ್ಪಂಗ್ ಅಲಿ ಹಿಡ್ದಂಗ್ ಇತ್ತ್… ಬಾಳು ಬನವಾಯಿತು…. ತಾನಿ ತಂದನೋ ತಂದಾನಿ ತಾನೋ……
ಒಲಿ ಮೇಲ್ ಇಡ್ಲಿ ಅಟ್ಟದಂಗ್ ಬೇಯುಕಿಟ್ಟ್ ಸೆಕ್ಕಿಟ್ಟ್ ಹಬೆ ಆಡುಕ್ ಸುರುಆಯ್ತ್.. ” ಈ ಮಕ್ಕಳ್ ಅಂಗಡಿಗ್ ಹೋದವ್ ಎಲ್ಲ್ ಮಾಯ್ಕ್ ಆದೋ.. ಕಣ್ಣಿಗ್ ಕತ್ತಲಿ ಆಪುಕ್ ಹಿಡಿತ್…ಬಿಲೆಸ್ ಬಿಟ್ಟ್ ಹೊಯ್ದೊ… ಇರ್ಲಿ ಹಬ್ಬು ಅಲ್ದಾ….”
“ಗಡಾ, ಪಡಾಯ್ ನರ್ಸಿಮಣ್ಣನ್ ಅಂಗಡಿಗೆ ಮಸ್ತ್ ಪಟಾಕಿ ಬಂದಿತ್, ಅಲ್ಲಿಗ್ ಹೊಯ್ಲಕ್ ಇತ್ತ್..” ” ಸುಮ್ನೆ ಇರ್ತ್ಯ ಒಂಚು; ಇಲ್ಲೇ ಎಂತ ಕಂಡ್ ತಕೊ.., ಕಣ್ಣಿಗ್ ಕೈ ಎಡ್ದ್ರು ತೋರುದಿಲ್ಲ… ಈ ಕತ್ಲಿಯಂಗ್ ಅಷ್ಟ್ ದೂರ ಹೆಂಗ್ ಹೋಪುದ್?… ಸೈಕಲ್ ಡೈನಮ್ ಬೇರೆ ಸರಿಯಿಲ್ಲ…. ಆ ಗೂಡ್ ದೀಪ ಕಾಣ್ ಒಳ್ಳೆ ಇತ್ತ್… ಮೂವತ್ತ್ ರೂಪಾಯಿ ಅಂಬ್ರ್ ತಕಂಬಾ?… ಕೈಯಂಗ್ ಇಪ್ಪುದ್ 72 ರೂಪಾಯ್.. ಅದ್ ತಕಂಡ್ರೆ ಪಟಾಕಿಗ್ ಎಂತ ಮಾಡುದ್? .. “ಸರಿ, ಅದ್ ಬ್ಯಾಡ, ಪಟಾಕಿ ತಕಂಬ …. ಅಬ್ಬಿ ಎರಡ್ ಪ್ಯಾಕೆಟ್ ಕ್ಯಾ೦ಡಲ್ ತಪ್ಪುಕ್ ಹೇಳಿದಳ್”…
” ಅಷ್ಟ್ ಲಾಯ್ಕ್ ಸೆಕ್ಕಿಟ್ಟ್ ಮಾಡಿದೆ.. ನಿಮ್ಮ್ ಬಾಯಂಗ್ ಒಂದಾರೂ ಇಳಿತಾ… ಆ ಪಟಾಕಿ ತಿಂದ್ಕಂಡೇ ಆಯ್ಕಣಿ…ಗಡಾ ಅದ್ ಬೆಚ್ಚ್ , ರಾಕೆಟ್ ಲಾಸ್ಟಿಗ್ ಇಡ್… ಈಗ ಸುಸ್ರ್ ಬತ್ತಿ ಹಚ್ಚ್… ಹಾಂ; ನಂಗ್ ಸುಸ್ರ್ ಬತ್ತಿ ಕೊಟ್ಟ್, ಘನಾದ್ ಎಲ್ಲಾ ನೀನೆ ಹೊಡ್ಸುವಾ ಅಂದೇಳಿ ಅಲಾ..? ಅದ್ ಮಾಲಿ ಪಟಾಕಿ ನಂಗ್ ಕೊಡ್.. ಗಡಾ ಹೇಳತ್ತ್ ಕೇಣ್, ಈ ಸಣ್ಣ್ ಸಣ್ಣದ್ ಎಲ್ಲಾ ಫಸ್ಟಿಗ್ ಹೊಡ್ಸ್ಕಂಬ…. ತಕೊ, ಹಾವಿನ ಮಟ್ಟಿ, ಮಂಗನ್ ಬಾಲ ಹಚ್ಚ್…” ” ನೀನ್ ನನ್ ಮಂಗನ್ ಮಾಡುದ್ ಬ್ಯಾಡ.. ಅದ್ ಒಂದ್ ನೂರರ್ ಮಾಲಿ ಈಗ ಹೊಡ್ಸುವ .. ಲಾಸ್ಟಿಗ್ ಇನ್ನೊಂದ್ ಇತ್ತಲಾ….”
ಢಂ… ಢಂ… ಢಂ…… ನಿಮ್ಮ್ ಕೈಗ್ ಕಿಚ್ಚ್ ಹಿಡುಕೆ.. ಆ ಹುಲ್ ಕುತ್ರಿ ಬದಿಯಂಗೇ ಆಯ್ಕಾ ನಿಮ್ಗೆ?… ಆಚಿಗ್ ಹ್ವಾತ್ರ್ಯಾ ಇಲ್ಯಾ?”…. ಅದ್ ಅಲ್ಲಿವರಿಗ್ ಹ್ವಾತಿಲ್ಲ ಮರೆತಿ…ನಿಂಗ್ ಒಂಚು ಸುಮ್ನೆ ಕೂಕಂಬುಕ್ ಆತಿಲ್ಲ್ಯಾ?ಅಬಾ ಅಜ್ಜಿಗ್ ಒಂದ್ ಸೆಕ್ಕಿಟ್ಟ್ ಕೊಡ್ ; ಐತಾ ಕೂಕಂಡ್ಲಿ…. ಆ ಗಿರಜ ನ ಮಗಿಗ್ ಒಂದ್ ಸುಸ್ರ್ ಬತ್ತಿ ಇದ್ರ್ ಕೊಡಿ ಮಕ್ಕಳೆ.. ಅದ್ ಆಗ್ಲಿಂದ ಮ್ಯಾಳಿ ಉದ್ದ ಮಾಡತ್ತ್… ಮಗು ಅಲ್ದಾ?… ಇಗಾ ಗಡಾ…. ಕೊಟ್ಟೆ ಅಂದೇಳಿ ಉಳ್ದರ್ನೆಲ್ಲ ಕರ್ಕ ಬರ್ ಬೇಡ .. ಇಲ್ಲೇ ಹಚ್ಚ್….ಅಲ್ಲ್ ಕಾಣ್ ನಿನ್ನ್ ಗಂಡಂಗ್ ಬೇರೆ ಕೆಲ್ಸ ಇಲ್ಲ… ಮಕ್ಕಳ್ ಒಟ್ಟಿಗ್ ಪಟಾಕಿ ಹೊಡುಕ್ ಹೋದ ಕಾಣ್”….ಅಪ್ಪಾ…. ರಾಕೆಟ್ ಇಟ್ಟ್ ಬಾಟಲಿ ವಾರಿ ಆಯ್ತ್.. ಸರ್ತ್ ಮಾಡಿ … ಅದ್ ಅವ್ರ್ ಮನಿಗ್ ಬೀಳತ್… ನೀನ್ ನಂಗ್ ಹೇಳುವನ್ ಆದ್ಯಾ? … ಕಾಣ ಇಲ್ಲ್….
“” ಢಂ”………….
” ನಿಮ್ಮ್ ಪಟಾಕಿ ಹೊಡ್ಸುಕ್ ನಮ್ಮನಿ ಕೋಳಿ ಗೂಡೆ ಆಯ್ಕಾ … ಮನಿ ಮಾರ್ ತೆಗಿತ್ರಿ ನೀವ್… ಹುಲ್ ಕುತ್ರಿ ಮೇಲ್ ಬಿದ್ದಿರ್ ಎಂತಾ ಸಾವುದ್…ಕರಳ್ ಗಂಟಿ ಎಲ್ಲಾ ಇದ್ದಿದೊ ಅಲಾ… ನೀವೆ ಸೈಯಾ ಅಂಗಾರೆ…. ಪಟಾಕಿ ಹಚ್….. ನಿಮ್….. ಕೋಳಿ………
ವರ್ಷಗಳು ಇಪ್ಪತ್ತು ಸಂದಂತಿದೆ…ಪಕ್ಕದ ಮನೆ ಗಿರಿಜಕ್ಕನ ಕೋಳಿಗೂಡಲ್ಲಿನ ಕೋಳಿ ಮಾತ್ರ ನೆನಪಿನಂಗಳದಲ್ಲಿ ಇಂದಿಗೂ ಕೂಡಾ ಮೊಟ್ಟೆ ಇರಿಸಿ ಕಾವು ಕೊಡುತ್ತಲೇ ಇದೆ.. “ದೀಪಾವಳಿ.”…..ಹಚ್ಚಿದ ಹಣತೆಗಳಲ್ಲಿ ನಗುವಿತ್ತು…ಕೈಗಳಿಗೆ ಬಡತನವಿದ್ದರೂ; ಮನಸುಗಳಲ್ಲಿ ಶ್ರೀಮಂತರಿದ್ದರು… ಸುತ್ತಲೂ ಹಬ್ಬವಿತ್ತು… ಹಬ್ಬಿತ್ತು….ಸಂಸ್ಕೃತಿ, ಸಂಪ್ರದಾಯದ ಪರಿಚಯವಿತ್ತು… ಆರಾಧನೆಯಿತ್ತು…
ಕಾಲ ಗತಿಸಿದೆ ಸರಿ….. ಸಂಸ್ಕೃತಿಯಲ್ಲ, ಆಚರಣೆಯಲ್ಲ,ಹಬ್ಬಗಳಲ್ಲ….ಕಲಿ, ಕಲಿಸುವ ಇಚ್ಛೆ, ಸಂಕಲ್ಪ ನಮ್ಮದಾಗಿದ್ದರೆ ಎಲ್ಲವೂ ಅಮರ….
ಕಗ್ಗಲ್ ಕದ್ರ್ ಆಯ್ಲಿ..ಬೆಣ್ಗಲ್ ಬೆಣ್ಣೆ ಆಯ್ಲಿ…ತುಂಬಿ ತೊಲೆ ಆಯ್ಲಿ…ಶಕ್ತಿ ಕಂಬ ಆಯ್ಲಿ…ಹೊದ್ದ್ ಹೊದಳ್ ಆಯ್ಲಿ…ಹೊಲಿಯನ್ ದೇವ್ರ್, ಬಲಿಯನ್ ದೇವ್ರ್ ..ಹೊಲಿ ಕೊಟ್ಟ್ ಬಲಿ ತಕಂಡ್ ..ತಮ್ಮ್ ರಾಜ್ಯಕ್ ತಾವೇ ಹೊಯ್ನಿ…..
“ಚಿಕ್ಕಪ್ಪ, … ಸರಿ ಹೇಳಿದ್ನಾ?…Very good…. Perfect…. ತಗೋ ಈ ಹೂವನ್ನ ಅಜ್ಜನ್ ಫೋಟೋಗೆ ಹಾಕು…. ಹಾಗೇ ಆ ಪಟಾಕಿ ಬಾಕ್ಸ್ ನ ಹೊರಗೆ ತಗೊಂಡ್ ಬಾ….
ಮನೆ ಮಗನಿಗೆ ಆರತಿ ಎತ್ತಿಬಾಳು ಬನವಾಯಿತು … ಓ..ಓ.ಓ..ಇರುಳು ಬೆಳಕಾಯಿತು……..ದೀಪಾವಳಿ ..ದೀಪಾವಳಿ…….
” ಹರಿಯಾ… ಆ ಟಿವಿ ಸೌಂಡ್ ಒಂಚು ಕಮ್ಮಿ ಮಾಡ್… ಕೆಮಿ ಹೊಯ್ತಾ ನಿಮ್ದ್? “…. ಅಬ್ಬಿ ಮಾತಾದಳು….ಅಪ್ಪ ಇಲ್ಲೇ ಎಲ್ಲೋ ನಕ್ಕಂತನಿಸಿತು……ಗ್ಯಾಸ್ ಮೇಲಿಟ್ಟ ಇಡ್ಲಿ ಅಟ್ಟದಲ್ಲಿ ಸೆಕ್ಕಿಟ್ಟ್ ಮತ್ತೆ ಹಬೆಯಾಡುತಿತ್ತು……. *********
ಲೇಖನ :ಹರೀಶ್ ಕಾಂಚನ್ ಮುದ್ದುರಾಧ.
